ಸರ್ವಜ್ಞ ಎಂದರೆ ?

ಸರ್ವಜ್ಞನ ಬಗ್ಗೆ ನಿಮಗಿಷ್ಟು ತಿಳಿದಿರಲಿ |

"ಸರ್ವಜ್ಞನೆ೦ಬುವನು ಗರ್ವದಿ೦ದಾದವನೇ, ಸರ್ವರೊಳು ಒ೦ದೊ೦ದು ನುಡಿಕಲಿತು ವಿದ್ಯೆಯ ಪರ್ವತವೇ ಆದ"- ಸರ್ವಜ್ಞ.

 ಈ ಸರ್ವಜ್ಞನೆ೦ಬುವನು ಯಾರು, ಎಲ್ಲಿ ಬೆಳೆದ, ಯಾವ ವೃತ್ತಿಯವನು, ಕೊನೆಗೆ ಎಲ್ಲಿಗೆ ಹೋಗಿ ಕಣ್ಮರೆಯಾದ ಎ೦ಬುದಲ್ಲೆವೂ ನಿಗೂಢವಾಗಿಯೇ ಉಳಿದಿದೆ.
ಚರಿತ್ರಕಾರರ/ಮತ್ತು ಅವನ ವಚನಗಳ ಪ್ರಕಾರ, ಈತನ ನಿಜವಾದ ಹೆಸರು ಪುಷ್ಪದತ್ತ , ಈತನ ತಾಯಿ ಮಲ್ಲಮ್ಮ, ತ೦ದೆಯ ಹೆಸರು ಬಸವರಸ. ಬೆಳೆದದ್ದು ಒಬ್ಬ ಶೈವ ದ೦ಪತಿಗಳ ಬಳಿಯಲ್ಲಿ. ಸಾಕು ತ೦ದೆ ಬ್ರಾಹ್ಮಣ, ತಾಯಿ ಮಾಲಿ ಎ೦ಬ ಹೆಸರಿನ ಶೂದ್ರ ಹೆ೦ಗಸು. 

ಈತ ಬೆಳೆದದ್ದು ಕರ್ನಾಟಕದ ಈಗಿನ ಧಾರವಾಡ ಜಿಲ್ಲೆಯಲ್ಲಿ. "ಸರ್ವಜ್ಞ"ನೆ೦ಬ ಕಾವ್ಯ ನಾಮವಿಟ್ಟುಕೊ೦ಡು, ಊರಿ೦ದ ಊರಿಗೆ ಬರಿಗಾಲಿನಲ್ಲಿ ನಡೆಯುತ್ತಾ, ಅಲೆಮಾರಿಯ೦ತೆ ಜೀವನ ನಡೆಸಿದ. ಯಾರಾದರೂ ಕೊಟ್ಟರೆ ಉಣ್ಣುವನು, ಇಲ್ಲದಿದ್ದರೆ ಬರಿ ಹೊಟ್ಟೆಯಲ್ಲೇ ಇರುವನು. ಎಲ್ಲ೦ದರಲ್ಲಿ ಮಲಗುವನು, ಆಕಾಶವೇ ಸೂರು ಭೂಮಿಯೇ ಹಾಸಿಗೆ. ವಿದ್ಯೆ ಕಲಿಸಿದ ಗುರು ಯಾರೋ ಎಲ್ಲವೂ ನಿಗಢ. ಸದಾ ಮೌನಿ. ಮಿತವಾದ ಮಾತು, ಹಿತವಾದ ನುಡಿ. ಯಾರಿಗೂ ಯಾವ ಕಾಲದಲ್ಲಿಯೂ ವೈರತ್ವ ಬೆಳೆಸದೇ, ಆಬಾಲ ವೃದ್ದರಿಗೆ ಗೆಳೆಯನಾಗಿ ಸದಾ ಹಸನ್ಮುಖಿನಾಗಿ ಬೆರೆಯುತ್ತಿದ್ದ. ಜನಗಳಿಗೆ ಈತನ್ನು ಹುಚ್ಚನೆನ್ನಬೇಕೋ, ಸ೦ತನೆನ್ನಬೇಕೋ ತಿಳಿಯದೆ ಇದ್ದರೂ ಅಂತೂ ತು೦ಬ ಗೌರವದಿ೦ದ ನಡೆಸಿಕೊಳ್ಳುತ್ತಿದ್ದರು. ಇವನು ಇದ್ದೆಡೆಗೇ ಆಹಾರ ಒದಗಿಸುತ್ತಿದ್ದರು. 

ಚಿಕ್ಕ ಮಕ್ಕಳು ಇವನನ್ನು ಹಿ೦ಬಾಲಿಸುತ್ತಾ ನೀಳ ಕೇಶಿಯಾಗಿದ್ದ ಸರ್ವಜ್ಞನ ಜೊತೆ ಗುಮ್ಮನ ಆಟವಾಡುತ್ತಿದ್ದ ಆ ಮಕ್ಕಳೇ ಧನ್ಯರು. ಯಾರಾದರೂ ಅನ್ನಿವಿಕ್ಕಿದರೆ ಒ೦ದು ವಚನವನ್ನು ಹೇಳುವನು, ಇಲ್ಲದಿದ್ದರೆ ಮೌನವಾಗಿರುವನು. ಇ೦ದು ಇದ್ದ ಕಡೆ ನಾಳೆ ಇಲ್ಲ, ಎಲ್ಲಿ ಉ೦ಡನೋ ಎಲ್ಲಿ ಮಲಗಿದನೋ ದೇವರೇ ಬಲ್ಲ. ಇವನು ಹಾಡಿದ ತ್ರಿಪದಿಗಳಿಗೆ ಸರ್ವಜ್ಞನ ವಚನವೆ೦ದು ಜನ ಕರೆದರು. ಈ ವಚನಗಳು ನೀತಿ ಉಪದೇಶ ಪೂರಕವಾಗಿದ್ದು, ಸಮಾಜದ ಒಳಿತಿಗಾಗಿಯೇ ಹೇಳಿದ೦ತೆ ಇತ್ತು. 

ಸುಮಾರು 7000 ತ್ರಿಪದಿಯ ವಚನಗಳು ಸರ್ವಜ್ಞನ ಹೆಸರಿನಲ್ಲಿ ಇವೆ. ದಿವ೦ಗತ ರೆವೆರೆ೦ಡ್ ಉತ್ತ೦ಗಿ ಚನ್ನಪ್ಪನವರು ಸರ್ವಜ್ಞನ ನುಡಿಗಳನ್ನು ಸ೦ಗ್ರಹಿಸಿ ಕನ್ನಡಕ್ಕೆ ಮಹದುಪಕಾರ ಮಾಡಿದ್ದಾರೆ. ಕನ್ನಡಿಗರು ಅನೇಕರನ್ನು "ಮತ್ತೊಮ್ಮೆ ಹುಟ್ಟಿ ಬಾ" ಎಂದು ಕರೆಯುವುದು ವಾಡಿಕೆ. ನೀನಾದರೂ ಮತ್ತೊಮ್ಮೆ ಹುಟ್ಟಿ ಬರ್ತೀಯಾ ಸರ್ವಜ್ಞ?